De Orde van de Gulden Humor

De Orde van de Gulden Humor, en daomej ’t lidmaatschap in de Broederschap van de Orde van de Gulden Humor, wurtj vanaaf 1962 as hoeëgste Limburgse vastelaovendjoongerscheî-jing doeër de Samewirkende Limburgse Vastelaovesvereniginge verlieëndj aan kandidate di-j zich bezûndjer verdeenstelik hebbe gemaaktj vörre bevordering vanne laevesbli-jheid, de humor of de vastelaovendj, ’n groeëte bekindjheid geneête inne provincie Limburg en neet uut commercieel ougpûnt betrokke zeen beej de vastelaovendj as zoeëdanig.

Gulden Humor in Wieërt

De towkinning van de Orde van de Gulden Humor gebuuërtj op vuuërdracht van alle SLV-lidvereîniginge. De Orde és in 1962 vör de ieërste kieër verlieëndj aan Charles Eyk, in 1963 aan Toon Hermans en in 1964 aan Godfried Bomans. Eder jaor verzörgtj ’n ânger SLV-lidvereîniging de fieëstelike umliêsting vanne uutreiking. Stadsvastelaovendjvereîniging De Rogstaekers uut Wieërt teîkendje ieërder vör dieës organisatie in 1974 (Mieke Bos-Janssen), 1996 (Jack Poels) en 2010 (Alf Poell). Op zaoterdig 27 november 2021 wurtj de Orde van de Gulden Humor vör de veerdje kieër in Wieërt uutgereiktj. Dit jaor véltj de ieër te buuërt aan Huub Stapel.

1974 Mieke Bos

Bron: Gemeentearchief Weert

1996 Jack Poels

2010 Alf Poell

De oongerscheî-jing

De Orde van de Gulden Humor wurtj gesymbolisieërdj doeër ’ne goud-witte steek en ’n medalie. De medalie és óntwôrpe doeër Kerkradenaar Lei Piekaz. Op dieës verguldje medalie stieët ’t doeër twieë maskers gekroeëndje waope van Limburg, ligkendj in eikels van ’t Broonsgreun Eikehout. Boeëve ’t waope stieët de Latiênse spruuëk LAETIFICANTI HONOR LATITIAE. Det beteîkentj ‘vrolijkheid és ’n ieër vör degene dae vrolikheid maaktj’.

 

Samewirkende Limburgse Vastelaovesvereniginge (SLV)

De SLV hieët tot doelstélling ‘t in stând haoje en bevordere van de vastelaovendj as ‘n uting van laevendje volkscultuur en folklore in Limburg. Vastelaovendj és ‘n belangriêk oongerdael van oeës Limburgs immaterieel êrfgood: lidjes, verhaole, dialecte, rituele, gebroêke en tradities.

Beej de SLV zeen aangesloeëte:

  • De Baeker Pottentaote
  • Génnepse Vastelaovesclup ’t Bombakkes
  • Karnevals Vereniging Burgerlust
  • D’r Kirchröatsjer Vasteloavends Verain
  • C.V. De Aanhawwersj
  • Stadscarnevalsvereiniging De Tempeleers
  • Sjtadsvastelaovesvereniging D’n Uul
  • Sjtadsvastelaoves Vereniging De Flaarisse
  • Comité Carnavalsviering Hoensbroek
  • Venloosch Vastelaoves Gezelschap Jocus
  • De Marotte
  • De Mirlitophile
  • Vastelaovesgezelsjap D’n Oeles
  • Vastelaovesvereniging De Piëlhaas
  • Stadsvastelaovendjvereîniging De Rogstaekers
  • Vastelaoves Vereiniging Steinder Bök
  • De Winkbülle