Laureaat 2021: Huub Stapel

De Orde van de Gulden Humor

Acteur Huub Stapel (Tegelen, 1954) kriegtj dit jaor de Orde van de Gulden Humor. Dieës oongerscheiding wurtj sieër 1962 doeër de Samewirkende Limburgse Vastelaovesvereniginge (SLV) uutgereiktj aan persoeëne di-j zich bezûndjer verdeenstelik hebbe gemaaktj vör de bevordering van de laevesbli-jheid, de humor of de vastelaovendj. Stapel volgtj Thijs Brand op. De beerbrawwer krieëg de oongerscheî-jing in 2019.

Limburger Huub Stapel woeërt bekindj doeër zien rolle in films wi-j ‘De lift’, ‘Flodder’ en ‘Amsterdamned’. Hae hieët verschillendje tillevisieprogramma’s geprizzentieërdj en és de léste jaore almer dékker te vînge op de Nederlandse theaterpodia. Eín van de bekindjste vuuërstéllinge és ’Mannen komen van Mars, vrouwen van Venus’ en ‘t werreldjberoemdje verhaol ‘Intouchables’. Op ‘t momênt stieët Huub Stapel volop inne belangstélling doeër zien rol as hasjbaron in de Netflixspuuëlfilm ‘Ferry’. Ouch spuuëltj hae ein van de hoeëfdrolle in ‘Flikken Rotterdam’.

Stapel woeëntj oongertösseal jaore  in Amsterdam, mer hae és Limburg altiêd traw geblieëve. Hae woeër dan ouch zieër verieërdj wi-j ‘m woeërt gevraogdj of hae dieës bezûndjer oongerscheî-jing in óntvangst woeëj neme.

Huub Stapel: ‘Al vanaaf ‘t oerbegîn van ‘t bestaon van dieëze priês sproeëk m’ne leêve vader Jo mét völ óntzag oeëver de priês, óngevieër ‘t hoeëgste waat d’r in e minselaeve te winne veel. Hae zoeëj apegruuëts zeen gewaesj det ein van zien wichter dieës schitterendje oongerscheî-jing in de wacht sleîpdje. Ich kân allein mer raoje nao wi-j gruuëts umdet Pa’s óntiêdige doeëd in 1975 ‘n indj maakdje aan alle speculaties dao-oeëver. Ich besef det ich in ‘n riêke traditie van illustere winnaars stap en beloeëf dan ouch plechtig ‘Humor-mét-‘n-hoeëfdlétter’ de rest van mien laeve bepaolendj te laote zeen vör mien waalbevînge, mer eigelik és det altiêd al zoeë gewaesj, as ich ieërlik bin’.